December 22nd, 2009

rusin, rusyn, русины

НАЙУСПИШНЄЙШЕ ПОТЕРАЗ

                  НАЙУСПИШНЄЙШЕ ПОТЕРАЗ Финални вечар 4. Медзинародней гумористично-сатиричней манифестациї Куцурски клип / Коцурска чутка / Kuczorai csutka / Kucura Corncob `009. отримани 20. децембра 2009. року. Манифестацию хтора представя специфични, уникатни и своєфайтови бренд, нє лєм Коцура алє и реґиона, творя, попри орґанизатора Културно-просвитного дружтва ДОК – Коцур и соорґанизаторох, Роботней єдинки Коцур Културного центра Вербас, Подружнїци Дружтва за руски язик, литературу и културу и Етно-клуба Одняте од забуца, и сами творителє гумористочно-сатиричних креацийох, хтори ше приявюю на Конкурс Чутки. На поволанку Орґанизацийного одбора Коцурскей чутки `009 одволали ше 34 авторе, цо по тераз найвекше число. Авторе углавним зоз Сербиї, алє и зоз 5 державох окруженя, з чим атрибут медзинародни, з єдного боку, оправдани, а, з другого боку, адекватни. Нажаль, Орґанизацийному одбору того року (перши раз) нє удало ше обявиц и нове число истоменного гумористично-сатиричного часописа, цо директни пошлїдок ШЕК- и ДЕК-и. И попри низких температурох, шнїгових наношенїскох, страху од вируса Г1Н1 и спомнутих кризох сала Дома култури Коцур була полна. Окремну чесц зоз своїм приходом указали и двоме републични посланїки - посланїца Олена Папуґа и посланїк Александар Чотрич.  Найдлугшу драгу прешол Драґан Матеїч зоз Краґуєвцу. Програма Финалного вечару почала зоз отвераньом вистави карикатурох Иґнята Ґатала зоз Савиного Села. По думаню фахового жирия у составу Аранка Медєши, Юлиян Пап, Микола Каменїцки и проф. др Михайло Фейса Ґатало найлєпши тогорочни карикатуриста Чутки. Програма конципована так же цекла од наймладших по найискуснєйших, та перша часц цаловечаршей сценско-музичней програми почала з предшколцами зоз Предшколскей установи Бошко Буха, Оддзелєня Герлїчка з Коцура. Руководителє-хореоґрафи танєчней точки на познату писню „Медо Брундо“ були Ясмина Йованович и Моника Гарди. Школяре трецей класи Основней школи Братство єдинство (Єлена Сендерак, Катарина Фейди, Александра Горняк и Александер Горняк), з помоцу Єлени Русковски, порихтали пар скечи. Андреа Макаї представела проблеми сучасних тинейджеркох з помоцу Тат`яни Мученски, Снежани Шанта и Дюри Макая.     По першей часци, условно наволаней Чуточка, представени вибор зоз обсяжного конкурсного, гумористично-сатиричного материялу. Прилоги гумористичарох и сатиричарох, хтори були зопарти присц до Дому култури Коцур (Слободана Янковича з Баня Луки, Стеви Стевича з Берчки, Танї Дюрдєвич з Велького Ґрадишта, Срдяна Йовановича з Владичиного Гану, Александра Деветака з Вербасу, Мариї Драґович, Янка Сабоа и Владимира Сабо Дайка з Коцура, Душана Матеїча Адского з Нишу, Милана Тодорова з Нового Саду, Велька Райковича и Деяна Тофчевича з Подґорици, Абдулагмана Галиливича Ахила, Васила Толеского зоз Скопя, Ани Карабатич зоз Сплита, Веселина Ґайдашевича з Фекетичу и Радета Дєрґовича зоз Шабцу) читали Сенка Иван, Марина Кухар и Мирела Мали. Авторе хторим ше поспишело присц на Финални вечар представели ше сами (Неваляни Юлиян и Драґан Матеїч), як и лауреати Чутки `009 (Александар Чотрич и Дюра Шефер Сримец). По одлуки жирия перше место подзелєли Дюро Шефер Сримец з Руми (за Шлєбодну тему) и Александар Чотрич з Беоґраду (за обробок задатей теми). Друге место припадло Митрови Митровичови з Нового Беоґраду, а треце Радойови Раоничови з Бачкого Доброго Поля, хтори були зопарти присц на Финални вечар. Лауреатом уручени дипломи и скромни дарунок-винчованки. Награда Соцки, хтора ше додзелює за найлєпши гумористично-сатирични прилог на руским язику, припадла Владимирови Сеґедийови з Руского Керестура. Найдлугша чутка пришла зоз фамелиї Чордаш, а принєсол з Михайло Чордаш юниор.  Як специялни госци у програми участвовали: Жридлова країшска шпивацка ґрупа Стари Ґрмечлийове, Михайло Будински (хтори гумористичну писню «Ода Коцурскей чутки» Дюри Шефера Сримца облєкол до музичного облєчива прейґ соло-наступа з ґитару), дїдо Ферко з Куцика (хтори по длугшим периоду одсуства направел успишни соло кам-бек) и Аранка Медєши (хтора виведла часц прешвечлїво побиднїцкей монодрами на нєдавно отриманим Фестивалу монодрами у Новим Садзе, авторки Славици Шовш, у режиї Дюри Макая). Други полчас Финалного вечара Коцурскей чутки отримани у просторийох Добродзечного огньогасного дружтва Коцур при смачним котлїку Ґабра Чельовского. Манифестацию софинансовал Покраїнски секретарият за културу з потримовку Националного савита рускей националней меншини и числених спонзорох. Манифестация отримана у рамикох Дньох рускей култури.                                                                   проф. др Михайло Фейса                                                                                                                                                                                    Приговор Украины Русинскому Народу.                                                                                                                                                                                                                                                                                                                САЙТ ПОДКАРПАТСКАЯ РУСЬ