Иван Калинич
Я БУДУЧНОСТЬ СВІТЛУ ЧЕКАЮ ДЛЯ КРАЮ
Я люблю ту землю, де я народився,
Де босый єм бігав в дьитинські годы,
Де м мамку и нянька любити навчився,
Де м пив из кырниці живої воды.
Нам сині Карпаты колысков служили,
А травы нам были шовковым ковром,
Карпаты народу подвойили силы,
Вбы жити вун муг туй на шиї з ярмом.
Там співанка файна у душу лігала,
А танець крученый серця веселив,
Там прадідув доля єднала кырвава,
Бо землю ту каждый всьым серцьом любив!
У груди вливались косиць ароматы,
Там рудноє слово всім радость несло,
Сурові и милі усім нам Карпаты,
Вас нам подарило з небес божество!
Май файної в світі землі я не знаю,
Жиє туй у світі майдобрый народ,
Я будучность світлу чекаву для краю
У світлі земных и небесных щедрот!
О Боже Всевышньый, пошли свою милость,
Народ наш достойный другого житя.
Най буде з ним вічно, што бы ни сталось,
Безмірна, всесильна Твоя доброта.
http://nashastoronka.livejournal.com/1028.html
